E seusu a igustu puntu, ca no seu siguru de nudda de si chi happu scrittu, ni chi is fueddus chi imperu sianta fueddus sardusu o de atra linguasa, strupiausu po parri sardusu, ni chi si scrianta e s'imperiti diaicci.
Custu esti su Sardu chi chistionu deu, iscrittu cummenti du connosciu e chistionu deu, chi no sciu scriri su sardu e du scriu cummenti chi fessidi Italianu.
Cussu, s'Italianu, gei mi d'hanti imparau, e beni puru, creu. A iscola, ma de prusu in sa televisioni (fueddu budru, ma po s'ammarolla), e mi praxidi puru, e meda! Chi nu fessidi po s'Italianu de Dante e de Manzoni, s'Italia iadessi abarrada su nomini de unu logu; si Mazzini essi chistionau su Francesu, immoi è facili chi Bossi fiada cicchendi de ci bogai i tedescusu de sa terra sua.
Su Sardu hanti ciccau de si du fai scaresci in donnia manera; prima is ispagnolusu, ladronisi, cun is predisi, ponendi po lei ca no si podiada fai prusu sa missa in Sardu; a pustisi is italianusu, prus de tuttusu i fascistasa, ca po accappiai "su fasci" tenianta abisongiu de pettiasa tottu parisi, e cussa sarda fiada un pagheddu arrevescia.
Ma finasa ai cussu puntu si salvada s'ignoranzia; po essi analfabeta (atru fueddu non sardu) una lingua bali s'atra, e si lassanta chistionai su Sardu. Dopu sa guerra (si liggidi: gu-erra) esti pattia sa battalla manna, po fai sparessi su Sardu de sa facc'e sa terra, fadendi bregungiai mannusu e pipiusu de sa lungua de is aiaius.
Custu non du podeusu permitti: cummenti faisi a sciri chini sesi chi no scisi de aundi benisi? e cummenti faisi a sciri de aundi benisi chi no cumprendisi si chi nanta o si chi hanti scrittu is chi ci fianta prima de tui.
Sciu de sempri (o si narada sempiri) chi no seu bonu (bellu mod'e nai nostu) a scriri su Sardu, ma cust'otta ollu provai. Scriendi, liggendi, e, mancai, connoscendi atrusu (mellusu: atturusu) chi dis praxidi accettottu.
p.s. ci funti fueddus currigìus po cosas chi happu cumprendiu a pustis de du du essiri scritus
p.s. ci funti fueddus currigìus po cosas chi happu cumprendiu a pustis de du du essiri scritus